Ölkə başçısı cənab İlham Əliyevin Qırğızıstana dövlət səfərinin mühüm nəticələrindən biri Azərbaycan–Qırğız İnvestisiya Fondunun maliyyə vəsaitinin 200 milyon dollara çatdırılması barədə əldə olunan razılaşma oldu. Bu qərar iki ölkə arasında iqtisadi əməkdaşlığın yeni mərhələyə qədəm qoyduğunu göstərən mühüm addımdır. Fondun kapitalının artırılması qarşılıqlı investisiyaların həcminin genişlənməsinə və yeni layihələrin həyata keçirilməsinə əlverişli şərait yaradır. Möhtərəm Prezident çıxışında qeyd edib ki, bu məbləğ son hədd deyil və gələcəkdə Fondun imkanları daha da genişləndirilə bilər. Bu yanaşma tərəflərin uzunmüddətli iqtisadi əməkdaşlığa böyük önəm verdiyini nümayiş etdirir.
Artıq Qırğızıstanda Fondun maliyyələşdirdiyi müxtəlif layihələrin həyata keçirilməsi yeni istehsal sahələrinin yaradılmasına və məşğulluğun artmasına töhfə verir. Birgə layihələr hər iki ölkənin sahibkarları üçün yeni biznes imkanları formalaşdırır. Bu proses təkcə iqtisadi gəlir əldə etmək məqsədi daşımır, həm də texnologiya, təcrübə və innovasiyaların qarşılıqlı mübadiləsinə xidmət edir. Səfər çərçivəsində İssık-Kul gölünün sahilində Azərbaycan dövlətinin vəsaiti hesabına inşa edilmiş “Bakı” hotelinin açılışı da iqtisadi əməkdaşlığın uğurlu nümunələrindən biri kimi qiymətləndirilir. Belə layihələr Azərbaycan investisiyalarının beynəlxalq miqyasda nüfuzunu artırır və ölkəmizin etibarlı tərəfdaş imicini gücləndirir. İnvestisiya Fondunun fəaliyyəti regionda iqtisadi inteqrasiyanın dərinləşməsinə də müsbət təsir göstərir. Bu əməkdaşlıq gələcəkdə sənaye, kənd təsərrüfatı, turizm, logistika və digər sahələrdə yeni ortaq layihələrin reallaşdırılmasına zəmin yaradır. Nəticə etibarilə, Fondun maliyyə imkanlarının genişləndirilməsi Azərbaycan ilə Qırğızıstan arasında iqtisadi əlaqələrin daha da möhkəmlənməsinə xidmət edən strateji qərar kimi qiymətləndirilə bilər. Bu addım iki dost ölkənin uzunmüddətli iqtisadi inkişaf məqsədlərinə uyğun olmaqla yanaşı, bütün türk dünyasında iqtisadi əməkdaşlığın güclənməsinə də mühüm töhfə verir.
Yalçın Abiyev
Neftçala rayonu
