Azərbaycan Respublikasının Prezidenti cənab İlham Əliyevin bu günlərdə İtaliyaya səfəri, iki ölkə arasında strateji tərəfdaşlığın daha da möhkəmlənməsinə siyasi, iqtisadi, enerji, mədəniyyət və təhsil sahələrində əlaqələrin dərinləşməsinə xidmət edən vacib bir hadisədir. İtaliya, Avropa İttifaqının ən böyük iqtisadiyyata malik ölkələrdən biri olaraq Azərbaycan üçün mühüm tərəfdaşdır. Prezident İlham Əliyevin səfəri zamanı iki ölkə arasında imzalanan sənədlər, siyasi dialoqun inkişafını və ikitərəfli münasibətlərin daha da gücləndirilməsini hədəfləyir. Strateji tərəfdaşlıq kontekstində bu əlaqələr, həm də Azərbaycanın Avropa ilə siyasi və iqtisadi inteqrasiyasını daha da gücləndirir. Azərbaycan və İtaliya arasında enerji sahəsində əməkdaşlıq xüsusi əhəmiyyət daşıyır. Trans-Adriatik Boru Kəməri (TAP) layihəsi, Azərbaycan təbii qazının Avropaya nəqlində əsas rol oynayır və İtaliya bu layihənin son dayanacağı kimi çıxış edir. Ölkə başçısı cənab İlham Əliyevin səfəri enerji təhlükəsizliyinin təmin olunması və Azərbaycanın Avropa enerji bazarındakı mövqeyinin möhkəmlənməsi üçün əhəmiyyətlidir. Həmçinin, bu səfər Azərbaycanın Avropaya qaz tədarükü ilə bağlı yeni imkanlar və gələcək layihələr barədə müzakirələr üçün əsas platforma oldu. Qeyd etdiyimiz kimi İtaliya Azərbaycanın ən böyük ticarət tərəfdaşlarından biridir, xüsusən də enerji sektorunda. Lakin, Prezident İlham Əliyevin bu səfəri təkcə qeyri-neft sektorunda deyil, həm də kənd təsərrüfatı, sənaye və texnologiya sahələrində də yeni layihələrin müzakirə olunması ilə nəticələndi. Həmçinin, bu səfər Azərbaycan iqtisadiyyatına xarici investisiyaların cəlb olunması üçün də mühüm rol oynaya bilər. Səfər çərçivəsində mədəniyyət və təhsil sahələrində də əlaqələrin inkişafı cənab İlham Əliyevin diqqət mərkəzində olmuşdur. Cənab İlham Əliyevin səfəri regional təhlükəsizlik məsələlərinin də müzakirə olunduğu bir platforma oldu. Qafqaz regionunda baş verən proseslər, xüsusən də Qarabağ münaqişəsi sonrası sülh quruculuğu və regionun stabilliyi mövzuları İtaliya üçün də maraq doğuran məsələlərdəndir. Azərbaycanın geosiyasi əhəmiyyəti bu kontekstdə daha da artır və bu səfər qeyd edilən məsələlərin müzakirəsi üçün əhəmiyyətli idi. Nəticə etibarilə cənab Prezidentin İtaliyaya səfəri Azərbaycan-İtaliya münasibətlərində yeni bir mərhələnin başlanğıcı kimi qiymətləndirilə bilər. Siyasi, iqtisadi və mədəni sahələrdə əməkdaşlığın dərinləşdirilməsi, Azərbaycanın Avropa ilə əlaqələrinin möhkəmləndirilməsi və regional təhlükəsizlik məsələlərində dialoqun gücləndirilməsi bu səfərin əsas nəticələri arasında yer alır.
Həbulla Rəhimov;
Neftçala rayon ziyalısı, müəllim
