İlon Maskın sahibi olduğu “SpaceX” şirkəti Starlink peyk internetinin sürətini əhəmiyyətli dərəcədə artırmağı planlaşdırır və istifadəçilərə gigabit sürəti təmin etməyi hədəfləyir.
Bu layihəni həyata keçirmək üçün radiotezlik spektrini genişləndirmək və orbitdə 30 min peykdən ibarət qrup yerləşdirmək tələb olunur.
İqtisadiyyat.az xəbər verir ki, “SpaceX” artıq bu məqsədlə ABŞ-nin Federal Rabitə Komissiyasına (FCC) müraciət edib.
Şirkət peyklərin ikinci nəslini daha aşağı orbitlərdə yerləşdirmək üçün icazə istəyir və 29.988 peyk yerləşdirməyi planlaşdırır. Bu dəyişikliklər, “SpaceX”ə görə, ikinci nəsil sistemin geniş zolaqlı, az gecikməli internet və hərtərəfli mobil əhatə yaratmasına imkan verəcək. Xüsusilə, indiyə qədər keyfiyyətli geniş zolaqlı internetə çıxışı olmayan milyardlarla insan üçün faydalı ola bilər.
“SpaceX” gecikməni 20 millisekunddan aşağı salmaq məqsədi ilə peykləri 340 ilə 365 km hündürlükdə yerləşdirmək istəyir. Əlavə tezliklər kosmik qurğular və yerüstü stansiyalar üçün əlaqə sürətini artırmağa kömək edəcək. Bu “SpaceX”in artan tələbata cavab verməsinə imkan verəcək.
