Bu gün Dövlətimiz tərəfindən Xankəndidə yaradılan infrastruktur layihələr şəhərin təkcə yaşayış məkanı deyil, həm də bilik və insan kapitalı mərkəzi kimi inkişaf etdirilməsinə imkan yaradır.
Azərbaycanın tarixi şəhərlərindən biri olan Xankəndinin Qarabağın bərpası prosesində xüsusi yer tutmasının bir sıra səbəbləri var. Şəhər 2023-cü ilin 15 oktyabr tarixində Azərbaycan Respublikasının Prezidenti cənab İlham Əliyev tərəfindən üçrəngli Dövlət Bayrağının ucaldıldığı əsas məkanlardan biri kimi tarixə keçdi. Bundan sonra Xankəndidə həyata keçirilən tədbirlər şəhərin yalnız inzibati deyil, həm də sosial, mədəni və iqtisadi funksiyalarının bərpasına yönəlib. 2023-cü ilin noyabrında burada Vətən müharibəsində əldə edilmiş Zəfərin üçüncü ildönümünə həsr olunan hərbi paradın keçirilməsi şəhərin ictimai həyatının yenidən canlandırılmasının nümunələrindən biri idi. Həmin ilin dekabrında Xankəndidə “Qarabağ” və MOİK komandaları arasında Azərbaycan Kubokunun oyununun keçirilməsi şəhərin idman həyatında yeni mərhələnin başlanğıcı kimi təqdim olunur. Sonrakı dövrdə şəhərdə təhsil və sosial infrastruktura xüsusi diqqət ayrıldı. Qarabağ Universitetinin yaradılması bu baxımdan ən mühüm layihələrdən biridir. Universitetin yaradılması regionda yüksəkixtisaslı kadrların hazırlanması ehtiyacının təmin edilməsi məqsədi ilə əlaqələndirilir. Bu addım Xankəndinin yalnız yaşayış məkanı deyil, həm də bilik və insan kapitalı mərkəzi kimi inkişaf etdirilməsinə imkan yaradır. 2024-cü ildə Qarabağ Universitetinin açılışının keçirilməsi şəhərin təhsil həyatının praktiki əsaslarının formalaşdığını göstərdi. Sonrakı illərdə universitetin klinikası, tibb və sağlamlıq elmləri fakültəsinin tədris korpusu və mühəndislik istiqaməti üzrə yeni layihələr həyata keçirildi. Bu obyektlər şəhərin gələcək sosial strukturunda təhsilin və elmi fəaliyyətin rolunu artırır. Xankəndidə mehmanxanaların yenidən qurulması da şəhərin xidmət sektorunun inkişaf etdirildiyini göstərən nümunələrdəndir. “Qarabağ” hotelinin, “Bulud” hotelinin və digər obyektlərin fəaliyyəti şəhərin qəbul imkanlarını genişləndirir. Xankəndi Konqres Mərkəzinin yaradılması isə şəhərin tədbir və beynəlxalq görüş məkanı kimi istifadəsinə şərait yaradır. 2025-ci ildə İqtisadi Əməkdaşlıq Təşkilatının 17-ci Zirvə görüşünün Xankəndidə keçirilməsi şəhərin beynəlxalq tədbirlər baxımından imkanlarının artmasını göstərən faktlardan biridir. Bununla yanaşı, Xankəndi-Biznes Mərkəzinin açılması iqtisadi fəaliyyət üçün institusional imkanların yaradılmasına xidmət edir. Tikiş fabrikinin fəaliyyətinin təşkili şəhərdə istehsal sahəsinin formalaşdırılmasına nümunədir.
2025-ci ilin sonunda elektrik yarımstansiyasının istifadəyə verilməsi şəhərin enerji təminatının möhkəmləndirilməsi baxımından əhəmiyyət daşıyır. Dəmir yolu və avtovağzal kompleksinin təməlqoyma mərasimi nəqliyyat əlaqələrinin inkişafı baxımından ayrıca əhəmiyyətlidir. Mədəniyyət Mərkəzinin açılması isə şəhərin sosial həyatında mədəni komponentin gücləndirilməsinə yönəlmiş addımdır. 2026-cı ildə Xankəndidə yeni istehsal müəssisələrinin və hotelin istifadəyə verilməsi iqtisadi fəallığın genişləndirilməsinin davam etdiyini göstərir.
Bu tədbirlər birlikdə qiymətləndirildikdə şəhərin bərpa modelinin çoxşaxəli xarakter daşıdığı görünür. Burada məqsəd yalnız dağıdılmış və ya fəaliyyətini itirmiş obyektlərin yenilənməsi deyil, yeni iqtisadi və sosial funksiyaların yaradılmasıdır. Xankəndinin gələcək inkişafı təhsil, istehsal, turizm, xidmət, mədəniyyət və nəqliyyat sahələrinin qarşılıqlı əlaqəsindən asılı olacaq. Bu baxımdan şəhərdə həyata keçirilən layihələr Qarabağın ümumi bərpa strategiyasının mühüm elementlərindən biri kimi qiymətləndirilə bilər.
Lamiyə Rüstəmli
Neftçala rayonu
